Pementeiras: unha historia de empoderamento feminino

No marco do programa de actividades organizadas pola Concellería de Igualdade polo 25-N, o Teatro Principal acollerá o próximo sábado 23 de novembro ás 21.00 horas unha representación da obra teatral “Pementeiras, unha historia de empoderamento feminino”, escrita e dirixida por Ramón Torrente e protagonizada por Ana Domínguez Chouza e Rebeca Oliveira García.

Acceso de balde ata completar aforo. 

Sinopse: Pementeiras narra a historia de dúas amigas que teñen un pensamento moi diferente da realidade social na que están inmersas. Sofía, unha muller nova, que ten grandes inquietudes e ganas de loitar polo seu recoñecemento persoal e profesional anímase a participar en calquera proxecto que mellore a súa situación actual. Por outro lado, Dosinda, unha muller tradicional arraigada aos valores do patriarcado non amosa ningún interese en mellorar a súa situación social e familiar, xa que para ela as cousas sempre foron así e non deberían cambiar.

Durante o desenvolvemento da obra, Sofía faille ver a Dosinda a situación na que se atopa e axúdalle a iniciar un proceso de reflexión persoal que lle deparará grandes cambios, tanto no ámbito familiar como laboral.