Volven os Vermús de Pinto e Maragota co faladoiro-concerto ‘Un Rapá Transquilo’ de Éric Dopazo

Dadas as actuais restricións sanitarias que afectan á hostalería, celebraremos en formato virtual o seu vindeiro Vermú de Pinto e Maragota, que terá lugar o sábado 5 de decembro ás 20:00 horas, desta vez da man do filólogo, músico e activista trans ourensán Éric Dopazo que presentará un faladoiro-concerto titulado ‘Un Rapá Transquilo’.

Segundo avanzou a concelleira de igualdade, Yoya Blanco, “este pandémico formato dixital, cuxa retransmisión desenvolverase en directo a través da canle de Facebook de Pinto e Maragota, consistirá nun espectáculo no que Dopazo alternará reflexións sobre a realidade do colectivo trans, con cuestións como a lei en debate, a linguaxe inclusiva ou o seu actual proceso de transición, coa interpretación de distintos temas musicais de creación propia xunto con algunha ‘cover’”.

Éric Dopazo formou parte do dúo musical Canela Cafuné e actualmente compón e interpreta en solitario e participa en diversas colaboracións. Foi o creador da canción ‘Universo Diverso’, coñecida como o ‘himno’ de Arelas, Asociación de Familias de Menores Trans de Galicia. A súa canle de Youtube ‘Un Rapá Transquilo’ está de finalista do Premio Comunicación do certame #Youtubeiras2000.