Máis de 800 nenas e nenos participarán desta iniciativa que percorrerá 14 centros educativos de Pontevedra a través da narradora Raquel Queizás. A primeira sesión desenvolveuse o xoves 22 de maio
Este xoves iniciouse a actividade Dámoslle volta ao conto! Contos pola igualdade que se organiza dende a Concellería de Igualdade, destinada ao alumnado de Educación Infantil e Primaria da man da narradora Raquel Queizás e que percorrerá catorce centros educativos da cidade ata o 2 de xuño.
As sesións, especialmente deseñadas para nenas e nenos desde os 3 anos, botaron a andar nos CEIP A Xunqueira 1 e A Xunqueira 2, buscando desmontar roles e estereotipos sexistas a través de contos tradicionais e historias de vida, con obxectos e monicreques.
Esta actividade seguirá venres 23, no CEIP Santo André de Xeve e a EEI de Verducido; luns 26, nos CEIP de Cabanas e Marcón; o martes 27, no CEIP Vilaverde de Mourente e no Daría González García; o mércores 28, no Froebel e no CPR San José; o venres 30 de maio, na EEI Fina Casalderrey e no CEIP Praza de Barcelos; e rematarán o luns 2 de xuño, nos CEIP de Lérez e Campañó.
O ano pasado os Contos pola Igualdade xa chegaron a máis de 800 crianzas de entre 3 e 9 anos, cifra que agardamos superar nesta edición.
Esta acción, financiada a cargo dos créditos do Pacto de Estado recibidos do Ministerio de Igualdade, Secretaría de Estado de Igualdade e contra a Violencia de Xénero, forma parte das estratexias da área dirixida pola concelleira Anabel Gulías para promover a igualdade e previr as violencias machistas desde as primeiras etapas da educación.
