O Campiño de Santa María converteuse este mediodía nun espazo de lecer e reivindicación, onde a música e os petiscos maridaron coa diversidade e a igualdade. Neste marco desenvolveuse o V Concurso Tortilleiro de Pinto e Maragota onde os e as participantes competiron en dúas categorías: tortilla de patacas tradicional e tortilla queer vexeta. Na grella de saída, 28 tortillas.
“Hoxe celebramos non só un concurso, senón a comunidade, a oportunidade de xuntarnos e compartir os espazos públicos, a parola, a música e apoiar a hostalería local nun contexto lúdico no que tampouco queremos esquecer a parte reivindicativa de Pinto e Maragota, o programa municipal que todos os días do ano busca visibilizar e dignificar a diversidade de sexo e xénero” subliñou a concelleira de Igualdade, Anabel Gulías, quen se sumou a cita gastro-festiva.
O xurado outorgou o premio á mellor tortilla tradicional a Eric Gonçalvez A súa proposta foi elixida entre 15 elaboracións. Tras del quedaron Lorena Sobral e Isabel Saavedra.
O premio á mellor tortilla queer vexeta, elixida entre 13 presentadas, foi para Luis Pintos. Seguido no podio por Lois Costas e María Gómez.
Atendendo ás bases do concurso Eric recibiu como premio un xantar ou cea para dúas persoas na Taberna Casa Solla (Poio) No caso de Luis, un brunch privado para dúas persoas no Misto Cafe Bar (Pontevedra)
No xurado cualificador había representantes da hostalaría local, de Pinto e Maragota e de AVANTE LGBT, Arelas e Entreprimas e as persoas gañadoras do concurso do ano pasado.
Xurado tradicional: o cociñeiro Pepe Solla; Miguel Ángel Velasco, gañador do pasado ano e Eva Mejuto, coordinadora de Pinto e Maragota.
Xurado queer: Manu Ouviña, do Bar Misto Eli Martínez, representante de Avante e Entreprimas e Samantha Almeida, representante de Arelas.
